Un mucha muhe di 2 aña cu a nace na Corsou. Su curiosidad ta e motor, pa siña nos muchanan na cas obheto-, palabra-, formanan y hopi mas. Esaki semper e ta haci den compania di su amigonan. Cu un caracter balente y alegre Èni ta disfruta cada paso siñando cos nobo.

Pako ta e mascota di Èni. Un cacho cu un rabo cu no ta stop di yanga. E gusta hunga y tambe e ta hopi curioso. Tur caminda cu Èni bay, Pako tambe ta presente. Tur cos cu Pako mira e ta kere ta cuminda.

Lupita ta aparece solamente ora Èni mester di dje. E ta wordo yama y ta aparece durante su cantica. Di e manera aki Lupita ta yuda dunando mas detaye di e obheto-, palabra- y formanan cu ta siña.

Mas personahe

Tocante nos

Como mayor ta bunita pa wak e curiosidad di nos yiunan, pa descubri y siña cos nobo. Pero e parti di mas bunita ta, pa ta envolvi den e fase aki hunto cu nan. Awendia nos muchanan ta lanta den un mundo cu tecnologia hopi avansa, cu ta hacie mas accesibel pa nan scoge locual nan kier wak y tambe den cua idioma, faltando nos idioma como un opcion di escogencia.

Nos ta kere den e ponencia cu ta bisa; muchanan cu por domina nan idioma materno, lo siña otro idiomanan mas facil ainda y tambe lo por expresa nan mes miho den nan propio idioma. Esaki lo aumenta nan autoestima for di trempan.

Mirando tur e puntonan aki, ami Layssa Vos-Pimentel y mi casa Dave Vos, mayornan di 2 yiu, un di 5 aña y un di 10 luna, a bin riba e idea di crea un caricatura na Papiamentu/o pa mucha di entre 0-5 aña, pa e islanan Aruba, Corsou y Boneiro. For di e momento cu e pen a haci e prome contacto cu e blachi blanco, nos idea a converti den algo mas cu un simpel idea.
Èni a nace!

Mesora Èni a cuminsa defini su proposito mas miho. E proposito cu Èni tin hunto cu su bestia -amiguitonan; pa hunto cu tur mucha descubri y siña forma-, palabra-, obhetonan y hopi mas di un manera interactivo, lagando nos muchanan sinti nan mes identifica.

Nos mision ta pa sigui yuda y aporta na e desaroyo di vocabulario y educativo di nos muchanan for di un edad tempran, uzando diferente medio interactivo pa asina nos muchanan diberti ainda mas. Di e forma aki nos ta yuda crea un base ainda mas fuerte di nos idioma, cuminsando for di na cas.

Nos lo sigui innova nos creatividad pa sigui produci mas material educativo y interactivo pa asina nos como mayor ta mas envolvi den e desaroyo di nos yiunan